ქალბატონო პრეზიდენტო, თქვენ განაცხადეთ, რომ საქართველოში რუსული სპეცოპერაცია ჩატარდა. თქვენ თქვით, რომ ადგილი ჰქონდა ჰიბრიდულ ომს, სრულ გაყალბებას და ტექნოლოგიის გამოყენებას. კონკრეტულად, რაში ადანაშაულებთ რუსეთს? და რა როლს ასრულებდა მმართველი პარტია? როგორ არიან ისინი ამაში ჩართული?
მმართველ პარტიას ვადანაშაულებ რუსული ფორმების, რუსული მეთოდების და ალბათ, ამ მართლაც სპეციალურ ოპერაციაში რუსული დაგეგმვის გამოყენებაში, რადგან ის, რაც ჩვენ ვიხილეთ და რასაც არავინ მოელოდა, ადგილობრივი სადამკვირვებლო მისიების ჩათვლით, რომლებიც აქ და რეგიონში სხვადასხვა ტიპის გაყალბებას მიჩვეულები არიან, არავინ მოელოდა იმას, რაც მოხდა – ეს იყო ძალიან კარგად ორგანიზებული და დახვეწილი გაყალბების ფორმები, რომლებიც მოიცავდა ყველანაირ ფორმას, ჩვეულებრივ დარღვევებს - დაშინებას, ზეწოლას იმ ადამიანებზე, რომლებიც საჯარო სამსახურზე ან სოცდახმარებაზე არიან დამოკიდებული. ეს ადრე ვიცოდით და წარსულშიც ყოფილა გამოყენებული გარკვეულ დროს. მაგრამ ამჯერად, იყო ტექნოლოგიის, ახალი ელექტრონული აღჭურვილობის შერევით.
ტექნოლოგიის კუთხით კონკრეტულად რა გაკეთდა?
"სომხური კარუსელი“. არ ვიცი, ამას ქართულ კარუსელს ხომ არ ეძახიან, რაც გულისხმობს იმას, რომ არჩევნებამდე გარკვეული დროით ადრე დაიწყეს სოცდახმარებაზე დამოკიდებული ადამიანების, პატიმრების ოჯახების პირადობის დამადასტურებელი მოწმობების სხვადასხვა მოტივით გამორთმევა. არავის ესმოდა, რატომ აკეთებდნენ ამას და იყო აზრი, რომ ეს მხოლოდ ზეწოლა იყო. სინამდვილეში კი ისინი ამ მონაცემებს ერთი და იგივე ადამიანის რამდენიმე ადგილას ხმის მისაცემად იყენებდნენ. ამან შესაძლებელი გახადა, რომ ერთი პირი ერთი პირადობით 17-ჯერ ,,მისულიყო“ ხმის მისაცემად და სხვადასხვა ელექტრონული აღჭურვილობა გამოეყენებინა, რადგან ისინი ერთმანეთთან მონაცემებს არ ცვლიდნენ. შედეგად, მათ ხელთ ჰქონდათ უამრავი პირადობა, ან პირადი ნომერი. კომისიები მთლიანად მმართველი პარტიის მიერ იყო დაკომპლექტებული, რომლებიც ცენტრალური საარჩევნო კომისიის ხელმძღვანელის მიერ იყვნენ დანიშნულნი, რომელიც სრულად მმართველი პარტიის ხელშია, როგორც თითქმის ყველა ინსტიტუცია დღეს ქვეყანაში.
მაგრამ თქვენ არ ადანაშაულებთ რუსულ სახელმწიფოს უშუალოდ იმაში, რომ თავად განახორციელა...
არა, მე რუსულ მეთოდოლოგიას ვადანაშაულებ, ალბათ, FSB-ს დახმარებას, რომელიც ხელისუფლებას გაუწიეს. ვნახეთ, რომ რუსული პროპაგანდა პირდაპირ გამოიყენებოდა. გასულ კვირას ვიხილეთ წინასაარჩევნო ვიდეო, რომელიც მმართველმა პარტიამ გაავრცელა და რომელიც ზუსტად იმეორებდა ვიდეოს, რომელიც პუტინის კამპანიის დროს გამოიყენებოდა. უკრაინის ომისა და საქართველოს ბედნიერების ,,შედარების“ შესახებ პლაკატები, რომლებიც არ ვიცი, ჯერ კიდევ ქუჩებშია თუ არა, მოსახლეობის ნახევარი აშკარად შოკში ჩააგდო. საქართველოზე ჰიბრიდული ზეწოლის ამ ტიპს ვხედავთ. ფსიქოლოგიური ელემენტებიც არსებობდა, რომლებიც ნათლად ჩანს, და არცერთი სხვა სამსახური არ იცნობს ქართველთა ფსიქოლოგიას ისე კარგად, როგორც ყოფილი რუსული კგბ, რადგან ისინი ათწლეულების განმავლობაში ამაზე მუშაობდნენ. ამგვარად, ყველაფერი გამოიყენეს, მათ შორის დიასპორაც, რომელიც დღეს ერთ მილიონს შეადგენს. ამ ადამიანებს, წინა არჩევნებისგან განსხვავებით, ამჯერად ხმის მიცემა სურდათ, რადგან მათთვის ეს იყო მათი მომავალი, ქვეყნის ევროპული მომავალი და არა ის, თუ რომელი პარტია იქნებოდა საქართველოს მმართველი. მათ სცადეს რეგისტრაცია, რაც ძალიან რთული აღმოჩნდა. ყველაფერი გაკეთდა, რათა ვერ შესძლებოდათ რეგისტრაცია და მხოლოდ 100,000-მა მოახერხა დარეგისტრირება. შემდეგ კი ვეღარ მისცეს ხმა, რადგან, მიუხედავად იმისა, რომ ექვსი თვის წინ დავიწყეთ მცდელობა, რათა ცენტრალურ საარჩევნო კომისიას, როგორც ეს კანონით არის გათვალისწინებული, გაეხსნა ახალი უბნები, ეს მოთხოვნა უხეშად უარყვეს. საბოლოოდ, მხოლოდ 30,000-მა შეძლო ხმის მიცემა, რადგან ძალიან ცოტა უბანი იყო გახსნილი და ძალიან გადატვირთული იყო, გარეთ გრძელი რიგებით, რაც ყველას არ აძლევდა შესაძლებლობას, ან საკუთარი სახელი ეპოვათ სიაში, ან ხმის მიცემა შესძლებოდათ. სხვადასხვა ადგილას სხვადასხვა მეთოდები გამოიყენეს და ამ ყველაფერმა შეძლო არჩევნების ნამდვილი მოპარვა, რადგან არჩევნების შედეგი ზუსტად ეგზიტპოლმა, Edison Research-მა აჩვენა.
ზუსტად ამ საკითხთან დაკავშირებით, თქვენ განაცხადეთ, რომ არჩევნები მოიპარეს, მაგრამ თქვენი ამერიკელი და ევროპელი პარტნიორები ასე შორს არ წასულან. მათ მოუწოდეს საქართველოს პოლიტიკური ლიდერებს, "ქართულ ოცნებას," გამოიძიონ დარღვევები, პატივი სცენ კანონის უზენაესობას და საქართველო ევროპულ გზაზე დააბრუნონ. თქვენ თავად განაცხადეთ, რომ ევროკავშირისა და აშშ-ის მხრიდან აქტიური მხარდაჭერა გსურთ.
გიპასუხებთ ამაზე, სხვა ქვეყნების საქმე არაა, გამოაცხადონ არჩევნები მოპარულად, ეს ასე არ ხდება.
გსურთ, რომ ამერიკელებმა და ევროპელებმა...
მგონია, რომ ისინი უნდა დარჩნენ იმ ხაზზე, რომელზეც წინასაარჩევნოდ იყვნენ. ისინი აცხადებდნენ, რომ მთავრობის წინააღმდეგ ზეწოლა არსებობდა. ეს ზეწოლა უნდა გაძლიერდეს, რადგან ჩვენი პარტნიორების მოთხოვნა იყო, რომ უარი ეთქვათ რუსულ კანონებზე, რომლებიც ადრე იყო მიღებული და თავისუფალი და სამართლიანი არჩევნები ჩატარებულიყო. ეს არ მოხდა. არანაირი დემოკრატია არ ყოფილა. ამიტომ უნდა გააგრძელონ ზეწოლა, რაც არჩევნების წინ იყო, არჩევნების შემდეგაც უნდა გაგრძელდეს. მათ მხარი უნდა დაუჭირონ...
თუ უნდა იყოს სანქციები...
თუ სანქციები იქნება, ეს იმ პარტნიორებზეა დამოკიდებული, რომლებმაც ეს გადაწყვეტილება უნდა მიიღონ. თუმცა, ნამდვილად არ არის დრო იმ ხელისუფლებასთან ურთიერთობების განახლებისთვის, რომლებიც ამ ეტაპზე ლეგიტიმური არ არის.
ამ წლის დასაწყისში ქვეყანაში დიდი პროტესტი იყო. თბილისის ქუჩები ხალხით იყო სავსე, რომელსაც უცხოური გავლენის კანონპროექტის წინააღმდეგ პროტესტი ჰქონდათ. თუმცა, შემდეგ ადამიანები სახლში წავიდნენ და "ქართულმა ოცნებამ" კანონპროექტი მაინც მიიღო. გგონიათ, რომ იგივე შეიძლება მოხდეს ამჯერად? გაქვთ თუ არა გრძელვადიანი გეგმა იმისათვის, რომ საქართველო ნამდვილად დარჩეს თავის ევროპულ გზაზე?
მაქვს გრძელვადიანი გეგმა, რომ საქართველო ევროპულ გზას კვლავ დაუბრუნდება. ვფიქრობ, ეს არის ის, რასაც დღეს ქართველი ხალხი ქუჩებში იტყვის. არ მაქვს პოლიტიკური გეგმა, რადგან ეს პოლიტიკურ პარტიებზეა დამოკიდებული, როგორ სურთ გაგრძელება. ჩემი გეგმა ნამდვილად არის ის, რომ გვჭირდება ჩვენი ევროპული პარტნიორების, ჩვენი ამერიკული პარტნიორების მტკიცე მხარდაჭერა იმ ნაწილში, რომელიც ევროპულია, რაც ქართული მოსახლეობაა. ქართული ხელისუფლება არ არის ევროპული, არ არის პროევროპული. ის დღეს რუსეთთან ერთად მუშაობს და უნდა მოუსმინოთ, რა კომპლიმენტები მიიღეს რუსი ლიდერებისგან. ეს არ არის მხოლოდ საქართველოს ბედი. ეს ძალიან მნიშვნელოვანი გეოპოლიტიკური საკითხია, რადგან საქართველო განსაზღვრავს კავკასიის დანარჩენი ნაწილის, სომხეთის, შავი ზღვის და ევროპის გაფართოების ბედს, რაც დღეს სხვა ტიპის გაფართოებაა. ეს გაფართოება ჩვენთვის ძალიან აუცილებელია, მაგრამ ასევე საჭიროა ევროპისათვის, ძლიერი ევროპისათვის, რომელიც უნდა იყოს ამ რეგიონებში და სჭირდება, რომ ეს რეგიონები სტაბილური იყოს და სტაბილურობა მხოლოდ ჩვენი სიახლოვის და ინტეგრაციის მეშვეობითაა შესაძლებელი.
გაწუხებთ თუ არა, რომ ერთადერთი ბერკეტი, რომელიც შესაძლოა, რეალურად გქონდეთ „ქართულ ოცნებაზე“ ამჟამად და თქვენი ევროპელი პარტნიორების საჩვენებლად არის ის, რომ პროტესტები გაქვთ?
ეს არის გზა იმის საჩვენებლად, თუ სად დგას მოსახლეობა. ეს სულაც არ არის ბერკეტი, პროტესტი ძალიან მშვიდობიანი იქნება, რადგან მოსახლეობამ იცის, როგორია ჩვენი გეოპოლიტიკური გარემო. სწორედ ამიტომ, ეს ყოველთვის საკმაოდ მოზომილი და საკმაოდ გააზრებულია სტაბილურობის შესანარჩუნებლად. თუმცა, ეს არის გზა, რომ მოსახლეობამ აჩვენოს, რომ მათ სხვა საშუალება არ აქვთ, რათა გამოხატონ ის, რომ მათი ხმები, მათი მომავალი, მათი შვილების მომავალი მოიპარეს. თუ არაფერი შეიცვლება ძალიან მალე, ჩვენ დავინახავთ, რომ ძალიან ბევრი ადამიანი დატოვებს საქართველოს, ახალგაზრდა თაობა, რაც ძალიან დიდი ტრაგედიაა. თუმცა, მიუხედავად ამისა, ამ ქვეყანაში დიდი გამძლეობაა. ჩვენ უარესი და უკეთესი მომენტები გავიარეთ. ამიტომ, მე ძალიან დარწმუნებული ვარ, რომ ევროპული გზა, რომელიც ამ ქვეყანაში მოსახლეობის 80%-ს სურს, მას (ევროპულ გზას) ამა თუ იმ გზით დაუბრუნდება.
ევროპული გზის შესახებ საუბრისას, უნგრეთის პრემიერ-მინისტრი ვიქტორ ორბანი თბილისში მოდის.
დიახ, ის ხელისუფლების განსაკუთრებული მეგობარია...
ზუსტად.
ასე რომ, ვიქტორ ორბანი ჩამოდის. გეშინიათ, რომ მან შეიძლება დააზიანოს ევროკავშირის ერთიანობა საქართველოზე და როგორ აფასებთ მის ვიზიტს?
მგონია, რომ თუ ის დააზარალებს ევროკავშირის ერთიანობას, ეს მხოლოდ საქართველოს ფარგლებში არ მოხდება. ასე რომ, ეს ევროპული საკითხია, არა ჩვენი. ვფიქრობ, რომ ეს არ იმოქმედებს მოსახლეობის სიღრმისეულ გრძნობებზე. ორბანის ჩამოსვლა და პრემიერ-მინისტრთან შეხვედრა მხოლოდ პოლიტიკური თამაშია, მაგრამ მოსახლეობის დამოკიდებულებას არ შეცვლის.
ასე რომ, არ ფიქრობთ, რომ ეს გარკვეულ ლეგიტიმურობას აძლევს?
არა.
კარგი.
ჩვენ გუშინ მოვუსმინეთ ევროპულ საბჭოს. ვფიქრობ, რომ გავიგეთ შარლ მიშელის განცხადება - ტვიტი. ნოემბერში ევროპული საბჭო იქნება და სწორედ იქ მოვისმენთ ევროპულ ხმას და არა ორბანის მეშვეობით.
