ქალბატონო პრეზიდენტო, თქვენ გუშინ თქვით, რომ არჩევნების შედეგი რუსულ სპეცოპერაციას წარმოადგენდა და გაყალბებული იყო. ეს პირდაპირი ბრალდებაა, რომ რუსეთმა საქართველოში არჩევნები გააყალბა?
არა. ეს ბრალდებაა იმაზე, რომ გამოყენებული მეთოდოლოგია და სავარაუდოდ, რუსეთის ფსბ-ს ტიპის მხარდაჭერა ჩანს ამ არჩევნებში, რადგან ძალიან დახვეწილი იყო (გაყალბება) მრავალი ტიპის გაყალბების გამოყენებით. ის პროპაგანდა, რომელიც არჩევნებამდე გამოიყენებოდა, აშკარა დუბლირება იყო, ზუსტად ისე, როგორც ის რუსული კანონი, რომელიც გვაქვს - უცხოური აგენტების შესახებ კანონი, რუსული კანონის მიხედვით დუბლირებული. ასევე, პროპაგანდა პირდაპირი დუბლირება იყო, პუტინის არჩევნების დროს გამოყენებული რუსული კლიპებისა და ვიდეოებისა. ასე რომ, რა თქმა უნდა, ვერაფერს დაამტკიცებ, მაგრამ მმართველი პარტიის კავშირები მოსკოვთან, ასევე დღევანდელი მხარდამჭერი მრავალი გზავნილი, რაც მათ მიიღეს, ნათლად აჩვენებს იმას, რაც ამუშავებულია ამ ქვეყანაში.
სადამკვირვებლო ორგანიზაციებმა განაცხადეს, რომ მნიშვნელოვანი დარღვევები მოხდა, რასაც შესაძლოა, შედეგებზე მოეხდინა ზემოქმედება, მაგრამ მათ არ უთქვამთ, რომ შედეგი აშკარად გაყალბებული იყო. მაინტერესებს, თქვენ გუშინ გამოსვლაში გაყალბებაზე ისაუბრეთ, რა მტკიცებულებები გაქვთ ამის შესახებ და შეძლებთ თუ არა მათ წარდგენას?
მე არ მჭირდება არანაირი მტკიცებულებების წარდგენა. საკმარისი ინფორმაცია მივიღე ადგილობრივი სადამკვირვებლო მისიებიდან, საერთაშორისო დამკვირვებლები ყველაფერს მაშინვე ვერ ამჩნევენ; მათ, ჩვეულებრივ, ბევრად გვიან გამოაქვთ დასკვნები. ეს მხოლოდ წინასწარი დასკვნაა და ბევრ შემთხვევას ვერ ვიხსენებ, როცა მათ არჩევნები დაუყოვნებლივ დაგმეს, ან არალეგიტიმურად გამოაცხადეს. ერთ-ერთი სადამკვირვებლო მისიის წარმომადგენლის პასუხი, რომ არჩევნების დაგმობა ქართველი ხალხისგან უნდა მოდიოდეს, ვფიქრობ, ძალიან სწორია. მათ შეუძლიათ დააკვირდნენ დარღვევებს, ხედავენ მხოლოდ ნაწილს, რაც ხდება. სრული სურათი მხოლოდ ჩვენთვის იკვეთება. ჩვენ ამას შედეგებში ვხედავთ, მაგრამ სრული სურათი ნელ-ნელა ჩნდება და ერთადერთი მსაჯული იყო თუ არა არჩევნები ლეგიტიმური, ქართველი ხალხია, და არა უცხოური სადამკვირვებლო მისია.
თქვენ დღეს საღამოსთვის საპროტესტო აქცია გამოაცხადეთ. იმის გათვალისწინებით, რომ მთავრობამ გამარჯვება გამოაცხადა, ხოლო საარჩევნო კომისიამ – თავისი შედეგები, რა არის ამ აქციების მიზანი? რევოლუციას ველოდებით? ესაა ახლა საჭირო? ვსაუბრობთ სახელმწიფოს ორ ნაწილზე, რომლებიც ერთმანეთს უპირისპირდებიან...
არა, სახელმწიფოს ორი ნაწილი არ არსებობს. სწორედ ესაა საკითხი ამ ქვეყანაში და ეს იყო არჩევნების შედეგი - 70%-ს სურს ევროპული მომავალი, ხოლო 30%, რაც წინა პერიოდის ყველა გამოკითხვაში გამოჩნდა, ქვეყნის ამჟამინდელ მიმართულებას მხარს უჭერს. ჩვენ არასდროს გვქონია საქართველოს ორი ნაწილი და დღეს საღამოს პროტესტი არ არის, ეს ქართველი ხალხის გამოხატვაა, რომ მათ ხმა მისცეს, რომ სურთ შეინარჩუნონ ევროპული მომავალი და სწორედ ამის მიმართ არიან ერთგულნი. ეს იყო ეგზიტპოლების შედეგი, რომელიც ერთ საათში შემობრუნდა. ეს იყო იმ ამომრჩევლების შედეგი, რომლებსაც თავისუფლად შეეძლოთ ხმის მიცემა - ჩვენი ქართველები საზღვარგარეთ, რომლებმაც ევროპულ მომავალს 90%-იანი, 85%-იანი მხარდაჭერა გამოუცხადეს ყველა იმ დედაქალაქში, სადაც კენჭისყრა იყო. მაგრამ იქაც, არჩევნების ორგანიზება ისე წარიმართა, რომ ყველაფერი გაკეთდა, რათა ჩვენ ერთ მილიონ თანამემამულეს საზღვარგარეთ ხელი შეშლოდა ხმის მიცემაში, რადგან ყველამ იცოდა, რომ ისინი ხმას ჩვენი ევროპული მომავლის სასარგებლოდ მისცემდნენ.
ანუ, თქვენ არ საუბრობთ მთავრობის დამხობასა და რევოლუციაზე?
არა... ხედავთ თუ არა ჩემს როლს, როგორც პრეზიდენტის, ამ ქვეყანაში ერთადერთი დამოუკიდებელი ინსტიტუციის რანგში, რომელიც არა ქვეყნის დესტაბილიზაციას, არამედ მოსახლეობის დაცვას და მათი ნებისა და აზრის გამოხატვის საშუალებას ემსახურება? ჩემი მიზანია, ჩვენი ევროპელი და ამერიკელი მეგობრების მხარდაჭერით, საქართველოს ევროპული გზა დავიცვა, რადგან წინააღმდეგ შემთხვევაში ვიხილავთ მმართველ პარტიას, რომელიც ახორციელებს თავის წინასაარჩევნო პროგრამას, რომელიც საჯაროდ გამოაცხადეს – დააპატიმროს ოპოზიციის ლიდერები, რუსული კანონის გამოყენებით შეზღუდოს სამოქალაქო საზოგადოება და გააკონტროლოს არასამთავრობო ორგანიზაციები და ოპოზიციური მედია სხვა სიტყვებით რომ ვთქვათ, ეს იქნება არა მარტო ერთპარტიული მმართველობა, არამედ ერთპარტიული დიქტატურა.
როგორც გავიგე, „ქართული ოცნების“ წარმომადგენელმა უკვე თქვა, რომ ისინი ახალი პარლამენტის პირველ სხდომას თქვენი თანხმობის გარეშეც დანიშნავენ. ახლა რა ხდება ოპოზიციისთვის? ანუ, გვაქვს პარლამენტი, რომელშიც მთლიანად „ქართული ოცნებაა“ დომინანტი, ხოლო ოპოზიციის დეპუტატები არ არიან, რადგან მათ ბოიკოტი გამოაცხადეს. ახლა რა ხდება?
პირველ რიგში, დღეს საღამოს ვნახავთ, ქუჩაში რა მოხდება. შემდეგ, ვფიქრობ, რომ ოპოზიციურ პარტიებს აქვთ საკუთარი სტრატეგია, რომელსაც ალბათ, მეც გამიზიარებენ. ნაწილობრივ ვიცი, რომ მათ შესაძლოა, ჩვენი ევროპელი პარტნიორების მხარდაჭერით ახალი არჩევნების ჩატარება მოითხოვონ. მანამდე, შესაძლოა, მოითხოვონ არჩევნებთან დაკავშირებული სავარაუდო ფაქტების დამოუკიდებელი გამოძიება, უფრო დეტალურად, ვიდრე აქამდე ცნობილ ანგარიშებშია. სამომავლო ქმედებების განსაზღვრა მათზეა, მაგრამ არ ვფიქრობ, რომ ეს ოპოზიციური პარტიები შეძლებენ შევიდნენ პარლამენტში, სადაც მმართველი პარტია მათ უკვე მეორე დღესვე დაკავებით ემუქრება.
მგონია, რომ საღამოს საპროტესტო აქციაზე ბევრი ადამიანი ქუჩიდან მთავრობის განდევნის მიზანს დაისახავს, როგორც ეს 2003 წელს მოხდა. რას ეტყოდით ამ ადამიანებს?
არ ვიცი. ამჟამად ეს პროტესტი ისეა აღქმული, როგორიც იყო რუსული კანონის წინააღმდეგ - რუსული კანონის გაუქმება და მაშინ იქ არავინ ცდილობდა მთავრობის გადაგდებას. აქაც მიზანი არჩევნების გამოსწორებაა, არჩევნების რომელიც მოიპარეს და ხალხისთვის მათი მომავლის დაცვის და ხმის გამოხატვის უფლების დაბრუნებაა. ვფიქრობ, რაიმე სხვა მიმართულებით ეს აღარ მიდის. ახლა საქმე უბრალოდ კონსტიტუციური უფლებების დაცვას ეხება. აქ საქართველოს კონსტიტუციურ წესრიგს გამოწვევის წინაშე არავინ არ აყენებს. ეს არაა ის, რასაც დავუჭერდი მხარს და არაა ის, რისთვისაც ხალხი გამოდის, რადგან უნდა იცოდეთ, რომ საქართველოს მოსახლეობა, ვფიქრობ, ეს ძალიან კარგად გამოიკვეთა გასულ წელს და ამ წელს რუსული კანონის წინააღმდეგ პროტესტების ორი ეპიზოდის განმავლობაში, მოსახლეობა ძალიან მკაფიოდ აცნობიერებს, რომ ვართ ძალიან დაძაბულ გეოპოლიტიკურ გარემოში და ვიცით, რომ არ გვინდა დესტაბილიზაციის გამოწვევა. ასე რომ, დარწმუნებული ვარ, ეს ძალიან მშვიდობიანი იქნება და ეს მხოლოდ მხარდაჭერაა იმ წინადადებების ან მოთხოვნების მიმართ, რასაც შემდეგ ოპოზიცია გააჟღერებს. რაც შეეხება იმას, თუ ხვალ, თუ ზეგ მმართველი პარტია დაიწყებს თავის მუქარების განხორციელებას, დაკავებებსა და სხვა ფორმების რეპრესიას, რაც ხალხს ძირითადი თავისუფლებების ჩამორთმევას გამოიწვევს, მაშინ არ ვიცი, რა რეაქცია იქნება. მაგრამ აშკარაა, რომ დღეს ეს არის ლეგიტიმური და მშვიდობიანი პროტესტი.
თქვენ, ამ შემთხვევაში, არჩევნების ხელახლა ჩატარებას ითხოვთ?
მე არაფერს არ ვითხოვ. პოლიტიკურმა პარტიებმა საკუთარი სტრატეგია უნდა შექმნან და ვფიქრობ, რომ ეს ერთ-ერთი ვარიანტია, რომლის განხილვასაც ახლა აპირებენ.
და მაინც, ჩვენ ვნახეთ, რომ "ქართული ოცნება" ჩვეულებრივ ქუჩის საპროტესტო აქციების წინაშე უკან არ იხევს, ერთი ან ორი შემთხვევის გარდა. ეს სიტუაცია, სავარაუდოდ, მხოლოდ უფრო და უფრო დაიძაბება ხომ?
მეც არ ვიცი. მომავლის პროგნოზირება არ შემიძლია. ვიცი მხოლოდ ის, დღეს რა სიტუაციაში ვართ. თუ არჩევნები მოპარულო იყო (და არა მხოლოდ არჩევნები) ეს ნიშნავს იმას, რომ საქართველოს ევროპული მომავალია მოპარული. ეს ნიშნავს, რომ ხალხი საქართველოს დატოვებს და ეს სრულიად განსხვავებული ტიპის რეჟიმი იქნება, რომელიც ასევე იმის კოპირება იქნება, რასაც მოსკოვში ხედავთ. არ მგონია, რომ ამისთვის მოსახლეობა მზადაა.
და თუ ეს მთავრობა დარჩება, როგორი იქნება საქართველო ხუთ წელიწადში?
არ მინდა ამის წარმოდგენა.
მესმის. ამ საკითხს კიდევ რომ ჩავუღრმავდეთ, თქვენ ფიქრობთ, რომ "ქართული ოცნების" მიერ არჩევნები გაყალბდა და მათ 54%-იანი შედეგი არ მოიპოვეს და თავისუფალ და სამართლიან არჩევნებში მეორე მხარე მოიგებდა.
ზუსტად. შემიძლია ზუსტად გითხრათ, რამდენი ხმის მოპოვება მოახერხეს. მათ მიიღეს 40%-ზე მეტი, ხოლო პრო-ევროპულმა ძალებმა დაახლოებით 57%. ეს იყო ეგზიტპოლების შედეგები, რომელიც იმავე ამერიკულ კომპანიას ეკუთვნის, რომელმაც წინა არჩევნების დროსაც ჩაატარა და 2-3%-ზე მეტი სხვაობა არასოდეს ჰქონია. ასე რომ, ზუსტად ვიცით, რა იყო არჩევნების მოცემულობა.
თქვენი პატივისცემით, ეგზიტპოლების გამოკითხვები შეიძლება არასწორი იყოს?
არა ამდენად. 15%-ით არ უნდა იცვლებოდეს. ეს ასე არ ხდება.
და თქვენი აზრით, ეს 15% ამომრჩეველზე მუქარით მოემატა?
ეს ჩემი აზრი არ არის. ეს მტკიცდება და ყველა ინფორმაციას მივიღებთ. მრავალი სხვადასხვა გზით ხდებოდა — ელექტრონული ხმის მიცემა გამოიყენებოდა, პირადობის დამადასტურებელი მოწმობები წაართვეს ან მოიპარეს, ფულს პირდაპირ ხმის მიცემის უბნებთან გასცემდნენ, საჯარო მოხელეები და მათი ოჯახები, ეთნიკური უმცირესობები პირდაპირი ზეწოლის ქვეშ იყვნენ და 97%-მა ხმა მისცა. ვფიქრობ, რომ სტალინის დროის შემდეგ, მსგავსი რამ არცერთ ქვეყანაში არავის უნახავს.
და მაინც ძნელია მთლიანად გამოაშკარავება..
ამის ჩვენება ყოველთვის ძალიან რთულია. ვერცერთმა ქვეყანამ ვერ შეძლო ამის წარმოჩენა. ვერც ამერიკის შეერთებულმა შტატებმა, როდესაც არჩევნებში რუსეთი ჩაერია, ვერც სხვა ევროპულმა ქვეყნებმა. ასე რომ, ჩვენ არ ვართ იმ მდგომარეობაში, რომ უფრო მეტად წარმოვაჩინოთ ეს, ვიდრე ქვეყნებმა, რომლებიც ბევრად უფრო ძლიერები არიან მათზე განხორციელებული ჰიბრიდული თავდასხმების დემონსტრირებაში. მაგრამ მნიშვნელოვანი ისაა, რომ არ მოხდეს ამის გარეთ დემონსტრირება. ეს არის ის, რაც მოსახლეობამ იცის, გრძნობს და ხედავს. ვინ შეიძლება უფრო კარგად ხედავდეს იმას თუ რა ხდება ქვეყანაში, სოფლებში, ვიდრე ქართველი მოსახლეობა?
ჩემი ბოლო კითხვა, როგორც ჩანს, „ქართულ ოცნებას“ თუნდაც ხმების 40%, რომ მიეღო ბევრმა ქართველმა, ვისაც სჯერა ევროკავშირში ინტეგრაციის, მაინც ,,ქართულ ოცნებას“ მისცა ხმა, რას ეტყოდით მათ?
40% ალბათ, გაყალბებით და რასაც მათ ვეტყოდი, იგივეა რაც არჩევნების წინაც ვუთხარი, რომ მაშინ მე ვიქნებოდი დემოკრატიული ქვეყნის პრეზიდენტი, რომელშიც იქნებოდა ძალიან დემოკრატიული ძლიერი ოპოზიცია, იმუშავებდა სხვა პროევროპულ ძალებთან ერთად, რათა ეს ქვეყანა ყოფილიყო ისეთი, როგორიც დიდი ხანია არ გვინახავს - ქვეყანა მრავალპარტიული მთავრობით, კოალიციური მთავრობით და პარლამენტში დემოკრატიულად მომუშავე, რაც აქამდე ასევე არ გვინახავს, რათა ეს ქვეყანა პროგრესისა და სტაბილურობის გზაზე წინ წაგვეწია.
გმადლობთ, ქალბატონო პრეზიდენტო.
მადლობა.
